CCCXXIX.

1426, März 5. (Kamenz).

Abt Nicolaus II. bestätigt den Wiederkauf einer Jahrrente zu Nossen.

Wir brudir Nicolaus von Paczkaw von gotis gnaden apth zu Kamencz thuen kunt und czuwissen allen, di desen briff sehen adir horen lesen, daz vor uns komen ist unser lieber getrawir Petir Schacz schulteys czu Nussen, in gesundikeyt dez lybis und der vornumft und hat bekant, daz her recht und redlich vorkauft hat, uff seyn gerichte zu Nussen und uff alle syne czugehorunge, weglich und unweglich, nichtes ausgenommen, eyne marg rechtir iargulde Bomischer grosschen Polnischer czal, der fromen iungfrawen Katharine, Niclos Schirmers tachtir, wonende vor Paczkaw, und noch irem tode Hannus Wecziger vor Paczkaw und Andres Sneyder czu Lyndenaw, umb czehen marg der vorgenanten groschen und czal, di deme obgenanten schultissen iczunt gancz und gar beczalt und gegeben sint, und den czins czu geben von deme selben schultissen den obgenanten kauffern alle iar uff aller Manne vasnacht und nu uff die nehesten czu komenden anczuheben, bey der phandunge, der en unser foyt helfen sal, alz uffte daz not wirt seyn, vor ire czinse; und mit den phanden se auch thuen mogen czu hande, alz ab alle recht domethe begangen weren, czu vorsetczen in Cristen adir in Juden. Auch wenne Petir Schacz adir wer daz gerichte ynne hat czu Nussen, also stadhafft werden, so mogen se und sullen den obgeschreben czins wedir kauffen von irem gerichte mit czehen marken der obgenanten groschen und czal, ungehindert aller sachen, dach unschedlichen den vorsessin czinsen. Und czu deme kauffe habe wir durch bethe und besserunge wille dez obgenanten schultissen getan unser gunst und willen und haben gereycht und reychen mit desim briffe der vorgenanten iungfrawen Katherine, Niclos Schirmers tachtir, und noch irem tode Hannus Wecziger und Andres Sneyder eyne marg iargulde alle iar czu nemyn und czu hebin uff deme gerichte zu Nussen und uff aller syner czugehorunge in aller mosse und meynunge, also obene stet geschreben und bestetigen daz alles nicht longir, wenne uff dry iar mit desim briffe dorubir geschrebin und und vorsegilt mit unserm segil czu guther gewissen. Daz ist geschen am dinstag vor Methevaste noch gotis geburdt virczenhundert und in deme sechs und czwenczigsten iare etc. Ad mandatum domini abbatis Johannes Nympcz.

An einem Pergamentstreifen hängt das starkverletzte Abtsiegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.